“Financial Experts Corporation”-ის გუნდი მზად ვართ გაგიწიოთ კვალიფიციური დახმარება ვირტუალური ზონის პირის სტატუსის მინიჭების, ასევე ბუღალტრული მომსახურების, საგადასახადო ვალდებულებების სწორად, სრულად და დროულად შესრულების კუთხით.

 

საინფორმაციო ტექნოლოგიების სფეროში ინვესტიციების მოზიდვისა და მიმზიდველი გარემოს შექმნისთვის 2011 წელს ამოქმედდა საქართველოს კანონი „საინფორმაციო ტექნოლოგიური ზონების შესახებ“.

აღნიშნული კანონის შესაბამისად, საინფორმაციო ტექნოლოგიებში იგულისხმება კომპიუტერული საინფორმაციო სისტემების შესწავლა, მხარდაჭერა, განვითარება, დიზაინი, წარმოება და დანერგვა, რის შედეგადაც მიიღება პროგრამული უზრუნველყოფის პროდუქტები.

ვირტუალური ზონის პირი, კი არის იურიდიული პირი, რომელიც ახორციელებს საინფორმაციო ტექნოლოგიურ საქმიანობას და მინიჭებული აქვს შესაბამისი სტატუსი.

ვირტუალური ზონა აღნიშნული კანონის შესაბამისად არის ვირტუალური ზონის პირი ან ამ პირთა ერთობლიობა.

ვირტუალურ ზონაში საქმიანობას მიეკუთვნება იურიდიული პირის მიერ განხორციელებული ეკონომიკური საქმიანობა, რომელიც საქართველოს ტერიტორიაზე მიმართული იქნება საინფორმაციო ტექნოლოგიების შექმნასთან.

იურიდიული პირი, რომელიც ახორციელებს საინფორმაციო ტექნოლოგიურ საქმიანობას, უფლებამოსილია ვირტუალური ზონის პირის სტატუსის მისაღებად მიმართოს საჯარო სამართლის იურიდიულ პირს – საფინანსო-ანალიტიკურ სამსახურს.

საფინანსო-ანალიტიკური სამსახური უფლებამოსილია დამატებით მოითხოვოს ინფორმაცია კანდიდატის მიერ საინფორმაციო-ტექნოლოგიურ საქმიანობასთან დაკავშირებით.

 პირს ვირტუალური ზონის პირის სტატუსი ენიჭება სტატუსის მინიჭებისათვის მიმართვიდან არა უგვიანეს 10 სამუშაო დღისა. სტატუსი გაიცემა უვადოდ. 

სტატუსის დამადასტურებელ დოკუმენტს წარმოადგენს ელექტრონული სერტიფიკატი, რომელიც გაიცემა სტატუსის მინიჭებიდან არა უგვიანეს 2 სამუშაო დღისა.

საგადასახადო შეღავათები:

ვირტუალური ზონის პირი მოგების გადასახადით მოგების განაწილებისას იბეგრება - მოგების გადასახადით დაბეგვრის ობიექტი განისაზღვრება საქართველოს საგადასახადო კოდექსის 97-ე მუხლის პირველი ნაწილის შესაბამისად. კერძოდ, ვირტუალური ზონის პირის მოგების გადასახადით დაბეგვრის ობიექტია:

- განაწილებული მოგება;

- გაწეული ხარჯი ან სხვა გადახდა, რომელიც ეკონომიკურ საქმიანობასთან დაკავშირებული არ არის;

- უსასყიდლოდ საქონლის მიწოდება/მომსახურების გაწევა ან/და ფულადი სახსრების გადაცემა;

- საქართველოს საგადასახადო კოდექსით დადგენილ ზღვრულ ოდენობაზე მეტი ოდენობით გაწეული წარმომადგენლობითი ხარჯი.

საქართველოს საგადასახადო კოდექსის 99-ე მუხლის შესაბამისად, მოგების გადასახადისაგან თავისუფლდება  ვირტუალური ზონის იურიდიული პირის მიერ შექმნილი საინფორმაციო ტექნოლოგიების საქართველოს ფარგლების გარეთ მიწოდებით მიღებული მოგება (მოგების განაწილება).

ვირტუალური ზონის იურიდიული პირი არის საქართველოს საწარმო და სხვა ნაწილში კონკრეტულად სტატუსისთვის განსაზღვრული საგადასახადო შეღავათები საქართველოს საგადასახადო კანონმდებლობით არ გაითვალისწინება.

 

სტატუსის გაუქმება:

 

ვირტუალური ზონის პირის სტატუსი უქმდება თუ: 

  • ვირტუალური ზონის პირის მიერ მოქმედი კანონმდებლობის შესაბამისად მიღებული სტატუსი გამოყენებული იქნება გადასახადების გადახდისაგან თავის არიდების მიზნით;

  • ვირტუალური ზონის პირის ელექტრონული განცხადების საფუძველზე;

  • ვირტუალური ზონის პირს მიენიჭა საქართველოს საგადასახადო კოდექსით განსაზღვრული საერთაშორისო კომპანიის სტატუსი, ასეთ შემთხვევაში, ვირტუალური ზონის პირის სტატუსი გაუქმებულად ითვლება პირისათვის საერთაშორისო კომპანიის სტატუსის მინიჭების თვის დასაწყისიდან.

 

შემოსავლების სამსახურის მიერ 2021 წლის 31 დეკემბრის N 42644 ბრძანებით დამტკიცდა მეთოდური მითითება ვირტუალური ზონის პირის მოგების გადასახადით დაბეგვრის თაობაზე. 

აღნიშნული მეთოდური მითითებით დაკონკრეტდა მნიშვნელოვანი მომენტები ვირტუალური ზონის იურიდიულ პირებთან დაკავშირებით:

  1. მეთოდური მითითების მიხედვით, მოგების გადასახადში საგადასახადო შეღავათის გავრცელების მიზნებისათვის არსებითია ვირტუალური ზონის პირი საქართველოს ტერიტორიაზე ქმნიდეს საინფორმაციო ტექნოლოგიებს და მის მიერ შექმნილი საინფორმაციო ტექნოლოგიების საქართველოს ფარგლების გარეთ მიწოდებით (მათ, შორის მომსახურების სახით მიწოდებით) იღებდეს მოგებას;

 

  1. საქართველოს ტერიტორიაზე საინფორმაციო ტექნოლოგიების შექმნად მიჩნევის საკითხის მიზნებისათვის სხვა ფაქტობრივ გარემოებებთან ერთად გასათვალისწინებელია, რომ ვირტუალური ზონის პირი საინფორმაციო ტექნოლოგიების შესაქმნელად არსებითად იყენებდეს საქართველოში შესაბამისი პროფილური განხრით დაქირავებული ფიზიკური პირების შრომას - ჰყავდეს სათანადო ადამიანური რესურსები საჭირო კვალიფიკაციით. ამასთანავე, საქართველოს ტერიტორიაზე ჰქონდეს საინფორმაციო ტექნოლოგიების შესაქმნელად აუცილებელი შესაბამისი აქტივები;

 

  1. თუკი ვირტუალური ზონის პირის დამფუძნებლები არიან ფიზიკური პირები, საინფორმაციო ტექნოლოგიები საქართველოს ტერიტორიაზე იქმნება უშუალოდ დამფუძნებლების მიერ და საწარმოს არ ჰყავს დაქირავებით მომუშავე პირები შესაბამისი პროფილური განხრით, ხოლო დამფუძნებელი რეზიდენტი ფიზიკური პირები შემოსავალს იღებენ მხოლოდ დივიდენდის სახით, შემოსავლების სამსახური იტოვებს უფლებას სსკ-ის 73-ე მუხლის თანახმად შეცვალოს ოპერაციის კვალიფიკაცია თუკი ოპერაციის ფორმა არ შეესაბამება მის შინაარსს.  

აღნიშნული გულისხმობს დივიდენდის სახით მიღებული შემოსავლის გადაკვალიფიცირებას ხელფასის სახით მიღებულ შემოსავლად.

მეთოდური მითითების მიხედვით, ამ მიზნით, პროფილური განხრით დაქირავებულ პირებზე ხელფასის სახით არსებით განაცემად შესაძლებელია ჩაითვალოს ხელფასის სახით გაწეული ხარჯები საწარმოს ფინანსური შემოსავლის 40%-ის ოდენობით;

 

  1. მოგების გადასახადის ნაწილში საგადასახადო შეღავათის გამოყენების მიზნით, ასევე არსებითია საინფორმაციო ტექნოლოგიების შექმნა და მიწოდება ხდებოდეს ვირტუალური ზონის პირის სტატუსის პირობებში;

 

  1. ვირტუალური ზონის პირის სტატუსის პირობებში დასაშვებია საქართველოს ტერიტორიაზე შექმნილი საინფორმაციო ტექნოლოგიების მიწოდება ხორციელდებოდეს როგორც საქართველოს ტერიტორიაზე, ისე მის ფარგლებს გარეთ. თუმცა, საგადასახადო შეღავათი ვრცელდება მხოლოდ საქართველოს ტერიტორიაზე შექმნილი საინფორმაციო ტექნოლოგიების საქართველოს ფარგლებს გარეთ მიწოდების შემთხვევაზე. 

იმ შემთხვევაში როდესაც ვირტუალური ზონის პირის მიერ საქართველოს ტერიტორიაზე შექმნილი საინფორმაციო ტექნოლოგიების მიწოდება ხდება, როგორც საქართველოს ტერიტორიაზე, ისე მის ფარგლებს გარეთ მნიშვნელოვანია მოგების გადასახადისაგან გათავისუფლებული მოგების იდენტიფიცირება. შესაბამისად, მნიშვნელოვანია გამოანგარიშებულ იქნას მთლიან მოგებაში გათავისუფლებული მოგების ხვედრითი წილი.

ამ მიზნით, თუ პირის მიერ გაწეული ხარჯების კონკრეტული შემოსავლისთვის მიკუთვნება შეუძლებელია, გათავისუფლებული მოგების გაანგარიშება შესაძლებელია განხორციელდეს მთლიან მოგებაში საინფორმაციო ტექნოლოგიების საქართველოს ფარგლებს გარეთ მიწოდებით მიღებული შემოსავლის ხვედრითი წილის შესაბამისად.

შემოსავლების სამსახური აკეთებს დაშვებას, იმ შემთხვევაში თუ შესაძლებელია სხვა უფრო ზუსტი და გონივრული მეთოდის გამოყენება, პირი უფლებამოსილია მოგების გადასახადისაგან გათავისუფლებული მოგების თანხა გამოიანგარიშოს ასეთი მეთოდის გამოყენებით.

აქვე გასათვალისიწინებელია, საქართველოს საგადასახადო კოდექსის 99-ე მუხლის მე-3 ნაწილის დებულება, რომლის მიხედვით, მოგების გადასახადისაგან გათავისუფლებული მოგების თანხის იდენტიფიცირებისათვის ითვლება, რომ საწარმოს მიერ დივიდენდის განაწილებისას პირველ რიგში ეს თანხა გაიცემა.

 

განვიხილოთ მაგალითი:

ვირტუალური ზონის პირის წლიურმა წმინდა მოგებამ შეადგინა 1 000 000 ლარი, ხოლო წლიურმა ფინანსურმა შემოსავალმა - 2 500 000 ლარი. მიღებული შემოსავალი შედგება საქართველოს ტერიტორიაზე შექმნილი საინფორმაციო ტექნოლოგიების საქართველოს ფარგლებს გარეთ (2 000 000 ლარი) და საქართველოს ტერიტორიაზე (500 000 ლარი) მიწოდებით მიღებული შემოსავლისაგან. პირმა მიღებული წმინდა მოგება სრულად გაანაწილა დამფუძნებელ ფიზიკურ პირებზე.

 

 შეფასება:

მოგების გადასახადისაგან გათავისუფლებული მოგება შეადგენს 800 000 ლარს 

(1 000 000 *2 000 000/2 500 000);

მოგების გადასახადით დასაბეგრი მოგება - 200 000 ლარს (1 000 000 *500 000/2500 000).

 

სსკ-ის 99-ე მუხლის მე-3 ნაწილის თანახმად, პირველ რიგში განაწილებულად გათავისუფლებული (საქართველოს ფარგლებს გარეთ მიწოდებით მიღებული) მოგება ჩაითვლება.

 

  1. მეთოდური მითითება ასევე განსხვავებულ მიდგომას აყალიბებს ვირტუალური ზონის იურიდიული პირის მიერ საქართველოში დაფუძნებული იურიდიული პირისგან მიღებული დივიდენდის დაბეგვრის საკითხთან დაკავშირებით.

სსკ-ის 981 მუხლის მე-2 ნაწილის „გ“ ქვეპუნქტის თანახმად, განაწილებულ მოგებად არ ითვლება „მეწარმეთა შესახებ“ საქართველოს კანონის მე-2 მუხლის მე-3 პუნქტით გათვალისწინებულ პირებზე დივიდენდების განაწილება, გარდა ინდივიდუალური საწარმოსი და ამ კოდექსის შესაბამისად მოგების გადასახადისგან გათავისუფლებული პირისა.

საქართველოს ფინანსთა მინისტრის 31.12.2010 წლის N996 ბრძანების 401  მუხლით განსაზღვრულია მოგების/საშემოსავლო გადასახადისგან გათავისუფლებული პირები, მ.შ. ვირტუალური ზონის იურიდიული პირი. 

მეთოდური მითითება განიხილავს შემთხვევას, როდესაც ვირტუალური ზონის იურიდიული პირი აფუძნებს რეზიდენტ საწარმოს საქართველოში, თვითონ კი დაფუძნებულია ფიზიკური პირების მიერ.

რეზიდენტი კომპანიის მიერ ვირტუალური ზონის პირისთვის დივიდენდის განაწილების შემთხვევას მეთოდური მითითება  არ განიხილავს სსკ-ის 981 მუხლის მე-2 ნაწილის „გ“ ქვეპუნქტის შესაბამის მოგების განაწილებად და ხაზს უსმევს, რომ დივიდენდის გაცემა დაებეგრება ვირტუალური ზონის იურიდიული პირის მიერ, როდესაც ის მოახდენს დივიდენდის გაცემას მის დამფუძნებელ ფიზიკურ პირებზე.

 

  1. მეთოდური მითითება ყურადღებას ამახვილებს ვირტუალური ზონის იურიდიული პირების საგადასახადო აგენტის ფუნქციაზე. ხოლო სტატუსის გაუქმების შემთხვევაზე აკონკრეტებს, რომ თუ ვირტუალური ზონის პირის მიერ მოქმედი კანონმდებლობის შესაბამისად მიღებული სტატუსი გამოყენებული იქნება გადასახადების გადახდისაგან თავის არიდების მიზნით,პირს გაუუქმდება ვირტუალური ზონის პირის სტატუსი და ფაქტობრივი გარემოებების გათვალისწინებით, პირის მიერ მიღებულ მოგებაზე არ გამოიყენება მოგების გადასახადით დაბეგვრის შეღავათიანი რეჟიმი.